O Cidade de Narón volve de Ourense cun punto que sabe a pouco

web sala ourense 200222

  • Os naroneses superaron un 2-0 adverso e a piques estiveron de facerse coa vitoria nun encontro intenso e moi disputado por ambos equipos
  • Brais, Iván e Jacobo foron os goleadores do encontro desta mañá

Narón, 20 de febreiro de 2022.- O Cidade de Narón arrancou esta mañá un punto de ouro contra o Sala Ourense que, sen embargo, soubo a pouco logo de acariciar a vitoria durante boa parte do segundo tempo. Un penalti asubiado cando a penas faltaban dous minutos para rematar o encontro poñía fin á remontada naronesa e á mala racha que persegue ao equipo de Javi Albes esta temporada. Ao final, empate a tres tantos e reparto de puntos nun choque moi competido entre dous equipos necesitados de puntos para saír da parte baixa da táboa.

O encontro comezaba cun Cidade que contiña ben en media cancha aos ourensás e que saía ben da súa presión. Ata que un erro en media pista cun rebote de por medio facía que Alli se levase o balón e Guerra marcase a porta baleira tras un erro na saída de Fer.

O Narón non baixou os brazos e continuou traballando sen grandes problemas defensivos en media cancha e comezando a ganduxar o seu xogo de ataque. Un traballo que propiciaba a primeira oportunidade clara para os amarelos nos pés de Rubén, que batía o balón ao traveseiro. Pola súa banda, o Ourense tentábao con accións de un para un e tiro exterior que se alternaban coas xogadas de estratexia por banda coas que o Narón creaba perigo.

O partido transcorreu cun ritmo lento que interesaba máis a un Cidade que se fixo forte na cancha dominando o xogo, mentres que o Ourense tentaba imprimirlle rapidez ao xogo pero sen a penas profundidade. E así se chegaba ao descanso: con vitoria pola mínima para os da casa.

O segundo tempo comezou do mesmo xeito: Cidade agardando en media cancha e o equipo local manexando o ritmo do partido, máis intenso con balón, tentando imprimir máis velocidade ao xogo pero cun equipo naronés moi firme en defensa. Ata que no minuto 22 os locais volvían a adiantarse no luminoso do Paco Paz logo logo dun tiro exterior cruzado.

Era o momento de reaccionar e así o fixo o equipo de Javi Albes xa que na seguinte xogada, Brais aproveitaba unha deixada de Jacobo como pivot, anotando o primeiro do Narón e metendo ao equipo no encontro.

O gol do capitán amarelo deulle alas ao Cidade que colleu forzas e comezou a saír co balón máis controlado e a xogar con máis facilidade co xogador máis avanzado. De feito, un bo balón en longo ao pivot propiciaba o segundo tanto do Narón, obra de Iván tras un tiro ao pao corto.

Con empate a dous no marcador, o Cidade aumentou a presión defensiva e subiu liñas. E dous minutos despois chegaría o terceiro tanto do Narón froito dun tiro exterior de Jacobo.

O partido gañou entón en viveza cun Cidade que saía ben á contra e un Ourense que intentaba recuperar o dominio do xogo de todos os xeitos: primeiro cun tiro ao traveseiro, logo cunha boa acción do porteiro incorporándose cun 5 para 4, con senllos disparos laterais exteriores que foron ben repelidos por Fer. Co asedio dos locais, o Cidade decidiu arriscar sacando porteiro xogador pero a estratexia que noutras ocasións lle deu bo resultado ao Cidade, nesta ocasión non saíu como se esperaba.

Corrían os minutos do marcador do Paco Paz e o equipo de Óscar Alvarez se animou co 5 para 4 e foi precisamente nunha posesión de superioridade cando un tiro exterior lateral petaba na man de Brais e os colexiados decretaban a pena máxima. Non fallou o Ourense e co gol de Alex de penalti que poñía o empate, se chegaba ao final malia aos intentos do Cidade por acadar os tres puntos.

O Cidade de Narón xogará este mércores o partido aprazado contra o Santiago Futsal. Será a partir das nove e media da noite no Pavillón de Santa Isabel.

 

Ficha técnica:

Sala Ourense: Dani, Illi, Guerra, Bermejo e Alex. Tamén xogaron Gus, Igor, Aaron, Iago e Fernando.

Cidade de Narón: Fer Combarro, Guille, Diego, Brais e Rubén. Tamén xogaron, Luis, Iván, Pablo e Jacobo.

Goles: (1-0) min. 2, Guerra; (2-0) min. 22, Bermejo; (2-1) min. 22, Brais; (2-2) min. 24, Iván; (2-3) min. 26, Jacobo; (3-3) min. 38, Alex.

Árbitros: Andrés Pinilla e Francisco Javier Roldán (C.T.A.F.S. Galego).

Pavillón: Pazo dos Deportes Paco Paz (Ourense).

Duro castigo para o Cidade de Narón en Santiago

Santiago web

  • Os naroneses caeron por un contundente 6-0 no partido adiado correspondente á xornada 17
  • O equipo amarelo xogará este sábado na Gándara un transcendental encontro contra o Ventorrillo

Narón, 25 de febreiro de 2022.- O Cidade de Narón sufriu un duro varapao no partido que o enfrontou na noite do mércores contra o Santiago Futsal ao caer por un contundente 6-0. Os de Javi Albes non puideron cun equipo férreo en defensa e acertado en ataque, que soubo aproveitar a aposta dos naroneses de ir a polo encontro co xogo de 5 para 4 para dominar o marcador. Pero ademais de recuperarse do resultado, o equipo amarelo terá que facer fronte ás lesións de Fer Combarro e Iván para afrontar o encontro deste sábado na Gándara contra o Ventorrillo.

O choque referiu dúas partes ben distintas: a primeira, na que os locais tiveron máis posesión de balón pero na que ambos equipos gozaron de boas oportunidades para anotar, e unha segunda na que o Cidade buscou o control do xogo pero na que os pupilos de Chipi non concederon.

O Santiago Futsal arrancaba moi forte xerando moitas accións de esquina e bandas e un Cidade que pouco a pouco ía entrando en xogo. De feito, o primeiro gol dos locais chegaba no minuto 3 logo dunha estratexia de banda obra de Antón.

O Narón tería a continuación varias oportunidades para estrearse no marcador que, sen embargo, non foi quen de converter. E antes de que o Santiago anotase o segundo tanto, Fer Combarro converteríase en protagonista ao desbaratar dous goles cantados para, de seguido, lesionarse nunha perna e ter que abandonar a cancha. O seu lugar ocuparíao Buxía, que se estreaba na portería do equipo naronés.

O segundo tempo comezou cun Cidade que subiu liñas e tentou apertar ao equipo santiagués. Sen embargo, lonxe de incomodalos, os da casa gañaban un balón de costas e anotaban, nunha segunda xogada, o terceiro tanto.

Cun Santiago crecido, o Narón sufría unha nova perda no inicio de xogo que Antón aproveitaba para anotar o cuarto gol do seu equipo e o terceiro da súa conta.

Tocaba ir a por todas e Albes recorreu neste último treito de partido á estratexia de 5 para 4 e, malia que os naroneses gozaron de dúas boas oportunidades, o porteiro local mantivo a súa portería inédita nesta xornada. Os que non perdoaron foron eles, que aínda anotarían dous tantos máis para deixar o luminoso de Santa Isabel cun incontestable 6-0.

O Cidade de Narón xogará este sábado un transcendental partido ante o Transricard Distrito Ventorrillo. Será na Gándara, a partir das cinco do serán.

 

Ficha técnica:

Santiago Futsal: Brais, Antón, Dani, Javi e Quintáns. Tamén xogaron Pedro, Diego, Pablo, Simón e Añón.

Cidade de Narón: Fer Combarro, Guille, Diego, Brais e Rubén. Tamén xogaron, Buxía, Rober, Pablo e Jacobo.

Goles: (1-0) min. 3, Antón; (2-0) min. 19, Antón; (3-0) min. 21, Dani; (4-0) min. 23, Antón; (5-0) min. 27, Javi; (6-0) min. 29, Javi.

Árbitros: Olivier Cardero e Iván Feliz (C.T.A.F.S. Galego).

Pavillón: Pavillón Municipal de Santa Isabel (Santiago).

O Cidade de Narón sufre un duro castigo ante o CD Unión Arroyo

web unin arroyo

  • Os naroneses pelexaron ata o final para remontar un marcador que se lles puxo de costas xa no primeiro tempo, malia a inaugurar o luminoso cun gol temperán no minuto 4 de partido
  • Brais foi o autor do segundo tanto naronés mentres que o primeiro era anotado en propia porta polo xogador visitante Mario nunha xogada de estratexia dos de Albes

Narón, 13 de febreiro de 2022.- Duro castigo para un Cidade de Narón que esta xornada se enfrontou na Gándara ao CD Unión Arroyo, terceiro na táboa clasificatoria. Os xogadores de Javi Albes deron a cara en todo momento ante un rival intenso e ben organizado na cancha que aproveitou os erros defensivos dos naroneses para escaparse no marcador. Co resultado final de 2-7, Albes lamentaba ao remate do partido “que os erros defensivos nos impediron chegar ao final do encontro con opcións”. En canto aos tantos da xornada, Brais foi o encargado de marcar o segundo tanto naronés, mentres que o primeiro era anotado e propia porta polo xogador visitante Mario.

O primeiro tempo arrancaba ben para o Narón, con moita intensidade e dinámica de xogo e cun gol en propia porta do Arroyo tras unha xogada de estratexia no minuto 4 que poñía ao Cidade por diante no marcador. Mentres, o equipo visitante aparecía cunha presión alta para impedir a saída local.

A medida que o crono foi avanzando, o choque medrou en intensidade e aí foi onde os pupilos de José Luis Sacristán se aproveitaron dos erros na saída de balón da escuadra amarela. Así, o primeiro tanto do Unión Arroyo chegaba no minuto 6 logo dunha perda de Iván en primeira liña saíndo de presión. E no 15, Cristóbal se aproveitaba dun balón que saía rexeitado logo dun despexe de Diego e anotaba o 1-2. Antes Fer Combarro impediu aos do Unión ampliar a vantaxe no luminoso da Gándara chapando un dobre penalti logo da sexta falta cometida polos locais. Pero a piques de asubiar o descanso, Javi marcaba o 1-3 tras unha perda de Pablo en primeira liña.

O segundo tempo arrancou coa mesma dinámica. Un Cidade que xerou moitas ocasións de gol pero que non foi capaz de bater ao porteiro visitante. Pola contra, o Unión Arroyo non desaproveitou as súas, e no minuto 23 anotou o cuarto tanto a través dun tiro de Javier.

Foi entón cando o Narón decidiu ir a polo encontro sacando porteiro-xogador e malia encaixar o 5 no minuto 31, a continuación chegou o gol de Brais.

A partir dese momento o partido se xogou sen moita orde: o Cidade seguiu xerando ocasións, pero foi incapaz de rematar con acerto as xogadas de perigo; e Arroyo sentenciou o choque tras anotar o sexto e o sétimo no 32 e no 35 de partido.

O vindeiro fin de semana o Cidade xogará na cidade das Burgas contra o Sala Ourense.

 

Ficha técnica:

Cidade de Narón: Fer Combarro, Rober, Iván, Diego e Brais. Tamén xogaron, Guille, Rubén, Pablo e Jacobo.

CD Unión Arroyo: Josué, Daniel, Adrián, Diego e Cristobal. Tamén xogaron Jaime, Sergio, Álvaro, Javier, Virgilio e Mario.

Goles: (1-0) min. 4, Mario (PP); (1-1) min. 6, Virgilio; (1-2) min. 15, Cristóbal; (1-3) min. 17, Javier; (1-4) min. 23, Javier; (1-5) min. 31, Virgilio; (2-5) min. 31, Brais; (2-6) min. 32, Daniel; (2-7) min. 35, Adrián.

Árbitros: Daniel Dacal Dez e Manuel Dans Rey (C.T.A.F.S. Galego).

Pavillón: CMD A Gándara (Narón).

O Cidade non pode cun Coruxo moi intenso e cae derrotado en Vigo

web Coruxo 050222

  • Os naroneses apostaron polo xogo de 5 para 4 para ir a polo partido pero un chisco de sorte dos locais e o seu acerto cara á portería botaron por terra a estratexia dos de Albes
  • Jacobo anotou o único tanto do equipo naronés

Narón, 6 de febreiro de 2022.- O Cidade de Narón sufriu esta xornada unha nova derrota tras o choque que o enfrontou en Vigo ao IES Coruxo FS. Malia á valente aposta do equipo naronés para facerse cos tres puntos, os de Javi Albes non tiveron a sorte de cara e volveron cun resultado que non fai xustiza ao acontecido no polideportivo vigués. Ao final, 5-1 a favor dos locais, con gol de Jacobo para o equipo naronés.

O partido arrancaba con moita igualdade na pista. Mentres que o equipo da casa imprimía intensidade ao xogo, o Cidade de Narón respondía con balóns ás costas dos xogadores vigueses.

Nestes primeiros compases de partido, O Cidade dispuxo de dúas boas oportunidades para inaugurar o marcador grazas a dúas boas accións de Rubén e Rober. Ao tempo, o porteiro naronés Fer Combarro conseguía manter en xogo ao seu equipo logo de chapar dous tiros exteriores laterais cargados de veleno.

E con empate a cero no marcador se chegaba ao descanso no municipal vigués. Vinte minutos de xogo no que o Coruxo gozou de maior posesión de balón e o Cidade alternou o xogo de 5 para 4 para frear o ritmo alto de partido no que os da casa se atopaban máis cómodos.

A segunda metade comezou na mesma liña, polo que os de Javi Albes volveron a apostar polo porteiro-xogador para retardar os envites do Coruxo. Pero nun tiro de Jacobo desde os 12 metros que foi rexeitado polo porteiro local, este, desde a súa propia área por elevación, conseguiu o primeiro tanto do partido cando corría o minuto 22.

O Cidade non se descompuxo malia este primeiro gol dos de Vigo e seguiuno tentado alternando o ataque de catro co porteiro-xogador.

Deste xeito, os de Narón conseguiron facerse coa posesión do balón pero foi o Coruxo no que nun rexeite marca a porta baleira o segundo tanto.

A partir dese momento, o partido medrou en intensidade e tamén en tensión, xa que mentres que o Cidade buscaba con maior énfase a porta contraria, os locais subían liñas para dificultar o inicio de xogo dos xogadores que adestra Javi Albes. Aínda así, o Narón contou con varias boas ocasións para recortar distancias nas botas de Rubén, Iván e Luis, que non foron quen de transformar. E nesas chegou o terceiro do Coruxo, novamente a porta baleira, obra de Pablo Parra no minuto 28.

Non mudou moito a faciana no último treito do partido: un Cidade que o intentaba unha e outra vez e un Coruxo que aproveitaba os rexeites para anotar o cuarto no minuto 33 e o quinto tanto a falta de dous segundos para o asubío final. Pero antes dese último e definitivo gol dos locais chegaba o tanto da honra do Narón a través de Jacobo.

O adestrador naronés Javi Albes resumía o choque entre Coruxo e Cidade como “un partido moi disputado onde chegamos sen opcións ao final do partido logo de apostar por unha estratexia sempre arriscada do porteiro-xogador, que non deu os froitos que agardabamos na segunda parte e que propiciou os tantos do equipo local”.

O vindeiro fin de semana o Cidade xogará na casa contra o CD Unión Arroyo.

 

Ficha técnica:

IES Coruxo FS: Jorge, Pablo Parra, Quique, Dani y Alejandro. Tamén xogaron Cristian, Pedro, Bruno, Pablo Calvo, Alberto e Alexis.

Cidade de Narón: Fer Combarro, Rober, Iván, Diego e Jacobo. Tamén xogaron, Luis, Eric, Guille, Rubén e Pablo.

Goles: (1-0) min. 22, Jorge; (2-0) min. 26, Quique; (3-0) min. 28, Pablo Parra; (4-0) min. 33, Alejandro; (4-1) min. 39, Jacobo; (5-1) min. 39, Alberto.

Árbitros: Alfredo Castro e Marcos Pérez (C.T.A.F.S. Galego).

Pavillón: PM de Coruxo (Vigo).

O Cidade acusa o parón por mor do COVID e cae contra o Segosala en casa

web segosala

  • Os naroneses remontaron un 0-3 no marcador e a piques estiveron de levarse os tres puntos no último treito do encontro
  • Brais, Diego e Rubén anotaron os tres tantos do Narón

Narón, 30 de xaneiro de 2022.- Volvía o Cidade de Narón ás canchas logo de dúas semanas de parón por mor do Covid. E facíao contra un Segosala que viña de empatar contra o primeiro clasificado do grupo, o Deporcyl Guardo, e coa baixa de Iván, pendente aínda de incorporarse á actividade deportiva. E malia que os de Narón levaron o peso do partido durante os 40 minutos de xogo, o Segosala demostrou maior acerto cara á porta facéndose cos tres puntos. Vitoria por 3-5 para os segovianos con goles de Brais, Diego e Rubén para os naroneses.

O partido empezaba cun Segosala moi intenso que recorría a unha defensa alta para dificultar a saída de balón dos naroneses, aos que lles custaba subir coa pelota controlada. Malia isto, o Cidade pasou poucos apuros neses primeiros intres de xogo cun rival que xogaba moi directo ás costas dos xogadores locais. Ata que no minuto 9, na que foi a primeira chegada clara do Segosala, Pedro lle gañaba ás costas á defensa naronesa provocando a saída de Niceto, que non era quen de chapar o tiro. 0-1 para o Segosala que se poñía por diante no marcador.

O partido entraba entón nunha dinámica máis tranquila, onde o segovianos continuaban cunha presión moi alta e o Cidade, a través das rotacións en pista, conseguía ter de novo o control do xogo pero sen efectividade na finalización. De feito, Pablo dispoñía dunha ocasión clarísima centro da área que erraba. Erros que repetirían Rober, Jacobo e Rubén. E cando estaba a piques de rematar a primeira metade, Marcos anotaba 0-2 para o Segosala. Un resultado co que se chegaba ao descanso.

A tónica da segunda parte foi moi parecida á do primeiro tempo: o Cidade corría co peso do partido e o Segosala continuaba coa presión pero retrasaba un pouco as liñas co marcador a favor. Así foi ata que no minuto 23 unha perda do Cidade en ¾ de pista propiciou unha contra dos visitantes que finalizou moi ben Postigo logo de regatear a Nice.

Con 0-3 no luminoso da Gándara e a falta de 13 minutos para acabar o partido, o adestrador naronés decidiu ir a por todas sacando porteiro xogador, o que cambiou a dinámica do encontro. Tanto foi así que, cun Cidade máis confiado no seu xogo, un minuto máis tarde, Brais poñía o 1-3.

O Segosala víase incapaz de frear os ataques de cinco para catro do Narón que dispuxo de varias ocasións claras ata que nun tiro exterior Diego poñía o 2-3 e xeraba ansiedade no equipo visitante, que vía como se lle escapaba a vantaxe do marcador. E faltando 3 minutos para o asubío final, Rubén poñía o empate, volvendo ás táboas iniciais .

O partido converteuse entón nun ir e vir dun e doutro equipo pero nunha xogada por banda ao segundo pao, o Segosala anotaba o cuarto tanto e volvía a adiantarse no luminoso. Malia este xerro de auga fría, o Cidade continuou intentando a épica e mesmo dispuxo de varias ocasións claras dentro da área de Rubén e Jacobo pero na última xogada, unha perda de balón do Cidade supuxo o quinto e definitivo gol a porta baleira.

Javier Albes lamentaba a pouca sorte do seu equipo no último treito de partido e que “o traballo do Cidade non teña recompensa malia a remontar un marcador adverso”. O vindeiro fin de semana o Cidade desprazarase a Vigo para xogar contra o IES Coruxo.

Ficha técnica:

Cidade de Narón: Nice, Guille, Diego, Brais e Jacobo. Tamén xogaron Eric, Rober, Rubén e Pablo.

Segosala: Bermejo, Óscar, Marcos, Portal e Marugán. Tamén xogaron Héctor, Postigo, Samuel, Adrián e Pedro

Goles: (0-1) min. 9, Pedro; (0-2) min. 17, Marcos; (0-3) min. 23, Postigo; (1-3) min. 28, Brais; (2-3) min. 36, Diego; (3-3) min. 37, Rubén; (3-4) min. 38, Postigo; (3-5) min. 39, César).

Árbitros: Lidia Crespo e Andrés Pinilla (C.T.A.F.S. Galego).

Pavillón: CMD A Gándara (Narón).

01_concello_naron.jpg03_xunta_de_galicia.jpg04_fundacion_deporte_galego.jpg05_deputacion_coruna.jpgFutgal.pngpadroado.jpg
02_logo_marcial.jpg03_logo_TOBS.jpg09_autos_camilo.jpg18_logo_error_ferrol.jpgFundacin Terra de Trasancos.jpgLogo O Paso nuevo.jpgVILNAR logo 1.jpgauman.jpg