Crónica do Xove - Cidade
O Cidade de Narón volve...
Crónica do Cidade - Leis
O Cidade de Narón vaise...
Crónica do CIDADE vs PARRULO "B"
O Cidade de Narón cae...
SÁBADO A FINAL DA "XXIX COPA GALICIA MASCULINA DE FÚTBOL SALA"
O PAVILLÓN POLIDEPORTIVO DA GÁNDARA...
Crónica do encontro Leis vs Cidade
O Cidade de Narón despide...
O Cidade de Narón cae pola mínima nas Pontes
-Brais foi o autor do único gol anotado polos naroneses no encontro correspondente á oitava xornada da Segunda División B da Liga Nacional
Narón, 12 de decembro de 2020.- Partido moi intenso o disputado esta tarde no Pavillón Municipal das Pontes entre O Esteo FS e o Cidade de Narón. O encontro, correspondente á oitava xornada da Segunda División B da liga Nacional de Fútbol sala, tivo dúas partes ben diferentes: os primeiros 20 minutos de xogo de claro dominio local e unha segunda parte onde o equipo de Javier Albes dominou claramente o xogo. Ao final, 2-1 a favor de O Esteo FS nun encontro no que Brais foi o encargado de anotar o único gol dos naroneses esta tarde.
A primeira parte arrincaba cun Esteo máis acertado en ataque e que levaba o peso do xogo, aproveitando mellor os roubos e as superioridades, mentres que o Cidade entraba aos poucos no partido, tentando adaptarse á pista de goma do pavillón pontés.
O primeiro gol non chegou ata o minuto 17 tras un saque de banda onde o balón chegaba a Cokito en zona de pivot e que, tras realizar un bo movemento cara á dereita, enviaba o balón ao fondo da rede. Con 1-0 no marcador, o equipo local metíase en cinco faltas, o que lle obrigaba a atrasar o súa defensa. Esta circunstancia era aproveitada polos amarelos para xerar un maior número de ocasións que, con todo, non lograban ter unha finalización clara. Así se chegaría ao descanso.
Tras a continuación do encontro, o partido mudou a súa faciana, cun Cidade cunha maior posesión de balón e un equipo local que arrincaba cunha defensa de ¾ para tentar dificultar o avance do Cidade. Precisamente cando os pupilos de Javier Albes estaban a xerar unha maior profundidade, con máis xogo de pivot e maior finalización, chegaba o segundo gol dos locais tras un saque de falta esquinada que conseguían meter dentro da área e Jhony remataba batendo a Niceto.
Corría o minuto 24 cando o 2-0 subía ao marcador do municipal das Pontes. Un tanto que servía para espolear o xogo do Cidade, que comezou a imprimir maior intensidade ao seu xogo, xerando máis ocasións e meténdolle maior ritmo ao partido. Isto obrigou ao Esteo a atrasar a súa posición a media pista e foi aproveitado polos naroneses para poñer o 2-1 no marcador tras unha xogada de falta que Brais convertía en gol e coa que se acurtaban as distancias.
A partir dese momento, o Cidade decidiu presionar e a O Esteo non lle quedou outra que xogar á contra. Así foron transcorrendo os minutos ata que os ponteses alcanzaron a quinta falta. O Cidade decidiu entón ir a polo partido sacando porteiro xogador, pero sen conseguir os resultados esperados.
Ao finalizar o encontro, o técnico Javier Albes destacou “a intensidade de xogo que imprimiron os dous equipos nos 40 minutos de partido e onde Esteo sacou un maior rendemento ao marcador curto que se deu esta tarde”.
A próxima fin de semana o Cidade de Narón desprazarase ata Pontevedra para xogar contra o Leis o encontro aprazado correspondente á primeira xornada da liga.
Ficha técnica:
Cidade de Narón: Niceto, Iago Otero, Diego, Brais e Iván. Tamén xogaron Guille, Buján e Rubén.
O Esteo FS: Javichu, Jacobo, Héctor, Rubén e Troncho. Tamén xogaron Coquito, Aitor, Alberto e Jhony.
Goles: (1-0) min 17, Cokito; (2-0) min. 24, Jhony; (2-1) min. 28, Brais
Árbitros: Iván Feliz Otero e Jorge Otero Mira (C.T.A. Galego). Amonestaron a Troncho, no minuto 13 e a Javichu, no minuto 31, por O Esteo FS.
Pavillón: Pavillón Municipal das Pontes.
O Cidade de Narón suma tres valiosos puntos ante o Ventorrillo
Oli en dúas ocasións, xunto con Diego, Iago Otero e Brais foron os encargados de anotar os goles dun encontro que rematou cun marcador de 5 tantos a 3
Narón, 5 de decembro de 2020.- Importante vitoria a colleitada na tarde de onte polo Cidade de Narón ante o Distrito Ventorrillo. O equipo que dirixe Javier Albes impúxose ao equipo coruñés por 5 tantos a 3 nun partido moi disputado que non se decidiu ata os últimos minutos. Os encargados de anotar na tarde de onte foron Oli en dúas ocasións, Diego Vázquez, Iago Otero e Brais.
O partido comezaba con intensidade e co primeiro revés para os de casa no primeiro minuto de xogo, xa que unha perda a media cancha do Cidade propiciou unha contra do Ventorrillo cun tres para un que acabou cun penalti de Niceto sobre Vituco que el mesmo transformou para poñer o 0-1 no marcador. Con todo, este gol temperán, lonxe de desequilibrar o xogo do conxunto naronés, serviu para que o Cidade se mantivese con calma e firme no seu xogo, mentres que o Ventorrillo carecía de profundidade e de pouca posesión de balón. Con este escenario, a escuadra naronesa xerou un bo número de ocasións de gol, a máis clara delas, un tiro ao pau de Iago Quintas. Iso, ata que Oli, nunha xogada colectiva a pase de Iván, conseguía o empate no marcador no minuto 9 de partido.
A partir deste intre, o Cidade fíxose claro dominador do xogo con varias ocasións para poñerse por diante no marcador. Pola súa banda, o Ventorrillo decidía cambiar un pouco a dinámica de xogo, aproveitando a saída a cancha de Buxia para incidir no xogo de pivot. Isto permitiulles poder gozar dunha maior posesión de balón e obrigar ao Cidade a empregarse algo máis en defensa. Con empate a un no marcador chegábase ao descanso do partido.
No segundo tempo, o Ventorrillo decidiu poñer en práctica a defensa de tres cuartos, o que provocou unha maior xeración de espazos na pista e que Diego aproveitase esta circunstancia no minuto 22 para poñer o 2 a 1 no luminoso da Gándara.
A partir deste intre, o partido entrou nunha dinámica de maior igualdade, cun contrario que se estiraba máis e creaba máis problemas na saída de balón ao Cidade. E dentro desta situación chegaba o empate a dous, obra de Vituco no minuto 27.
Coa igualdade no marcador, o Ventorrillo empezou a xerar máis ocasións, apertando con máis perigo, ata que unha gran xogada individual de Vituco poñía por diante no marcador ao equipo coruñés. Isto sucedía no ecuador da segunda parte, cun Cidade que, lonxe de descompoñerse, mantiña a calma, alternando xogadas co pivot e o xogo de catro. A cinco minutos do final chegou o empate, cun balón que se xogou ao espazo e Oli empuxou coa esquerda ao fondo da rede.
E un minuto despois chegaría o 4 a 3, tras unha gran xogada colectiva do conxunto naronés que Iago Otero rematou ao segundo pau. O último gol do encontro produciuse a falta de dous minutos e medio para a súa finalización, tras unha xogada individual de Brais que, tras irse por banda, finalizaba coa punteira.
Ao termo do partido, o técnico naronés recoñecía o esforzo dos seus xogadores para remontar o encontro e levar os tres puntos “grazas ao bo traballo colectivo desenvolvido”.
Ficha técnica:
Cidade de Narón: Niceto, Iago Otero, Diego, Brais e Iván. Tamén xogaron Guille, Iago Q, Rubén e Oli.
Distrito Ventorrillo: Oscar, Alex, Vituco, Guillán e Andrés. Tamén xogaron Berto, Buxía, Kevin e Toca.
Goles: (0-1) min 1, Vituco; (1-1) min. 9, Oli; (2-1) min. 22, Diego; (2-2) min. 27, Vituco; (2-3) min. 29, Vituco; (3-3) min. 34, Oli; (4-3) min. 35, Iago Otero; (5-3) min. 37, Brais.
Árbitros: Roberto Amor Vizoso e Mario Salinas García (C.T.A.F.S. Galicia). Amonestaron a Niceto, no minuto 1 e a Rubén, no minuto 34, polo Cidade de Narón; a Jandro, no minuto 22; a Vituco, no minuto 33; e a Guillán, no minuto 38, polo Distrito Ventorrillo.
Pavillón: Polideportivo Municipal de A Gándara. A porta pechada.
O Cidade de Narón cae ante A Estrada Futsal na Gándara
O encontro rematou cun marcador de 1-3, nun partido condicionado tras a expulsión, no minuto 33, de Buján
O vindeiro partido do Cidade terá lugar o vindeiro 5 de decembro, ante o Ventorrillo, no Polideportivo da Gándara
Narón, 21 de novembro de 2020.- O Cidade de Narón caeu derrotado esta tarde no polideportivo da Gándara no encontro que o enfrontou ao equipo pontevedrés de A Estrada Futsal. O marcador final de un tanto a tres a favor dos visitantes deixou un mal sabor de boca nos locais, logo do bo encontro que viñan de xogar hai unha semana ante o Ourense.
O certo é que o equipo da Estrada entraba con máis intensidade no partido provocando dúas boas ocasións na meta de Nice. Sen embargo, a partir do minuto 5 se igualaba a contenda logo de que o Cidade decidise levar o peso do partido. Tanto foi así que no minuto 15 chegaba o gol da escuadra amarela . Un tanto dunha fermosa factura obra de Iago Q, nun tiro axustado ao pao. Antes de rematar o primeiro tempo, o Cidade sumaría a súa quinta falta, o que condicionou en boa medida o seu xogo ata o chegar ao descanso.
Na segunda parte, o equipo que dirixe Javier Albes seguiu levando o peso do partido con varios disparos exteriores, mentres que A Estrada se seguía defendendo ben en media cancha. O tanto dos pontevedreses chegaría froito dunha falta centrada que Moro conseguiu converter nun tiro directo.
Co empate no marcador, o xogo entrou nun momento de calma, cos dous equipos intentando non cometer erros. Pero nunha xogada polémica, logo dunha disputa entre Manuti e Buján, este resulta expulsado e deixa á Estrada cun catro para tres que Jorge finalizou desde unha esquina poñendo o 1-2 no luminoso da Gándara. A partir dese momento, o partido perdeu a orde cun Cidade envorcado no ataque pero sen conseguir anotar.
O terceiro tanto dos de A Estrada sairía das botas de Pablo, logo dun roubo na área do Cidade que Nice non conseguiu atallar. Os últimos minutos de partido o equipo local tentaría a remontada cun cinco para catro que non deu os resultados esperados.
O Cidade de Narón volverá xogar no polideportivo da Gándara o vindeiro sábado 5 de decembro, a partir das 19 horas, ante o Ventorrillo.
Ficha técnica:
Cidade de Narón: Niceto, Guille, Diego, Brais e Buján. Tamén xogaron Iago Q, Rubén, Iago O., Oli e Iván.
A Estrada Futsal: Iago Balsa, Moro, Jorge, Pablo e Petetes. Tamén xogaron Juan, Kiko, Perico, Gonzalo, Kinso e Manuti.
Goles: (1-0) min 15,Iago Q.; (1-1) min. 26, Moro; (1-2) min. 33, Jorge; (1-3) min. 38, Pablo.
Árbitros: Pablo Coello Martínez e José Luis Rey Hermida (C.T.A.F.S. Galicia). Amonestaron a Iago Q., no minuto 16; a Nice, no minuto 26; a Brais, no minuto 32; e a Buján con tarxeta vermella, no minuto 33; a Gonzalo, no minuto 7; e a Manuti, no minuto 33, polo Estrada Futsal.
Pavillón: Polideportivo Municipal da Gándara. A porta pechada.
O Cidade de Narón suma tres puntos tras vencer ao Sala Ourense na casa
O equipo naronés gañou por 3 tantos a cero con goles de Diego, Guille e Buján
O próximo encontro será o vindeiro sábado contra o recentemente ascendido Estrada Futsal, no polideportivo da Gándara
Narón, 15 de novembro de 2020.- O pavillón polideportivo da Gándara foi escenario onte da primeira vitoria da tempada en casa do equipo que dirixe Javier Albes. Un partido disputado e moi traballado por parte do conxunto local que remataría cun tres a cero a favor do Cidade, froito dos tantos anotados por Diego, Guille e Buján.
O encontro arrincaba con Alberto Niceto en porta, Guille, Diego, Brais e Buján. Un quinteto inicial moi traballador e intenso, que poñía en aprietos a portería defendida por Rubén desde os primeiros minutos de xogo. Esa intensidade da escuadra amarela provocaría que no minuto 8 Diego anotase o 1-0 tras unha xogada trenzada entre Alberto, Iago O. e Diego. Unha xogada que referendaba o bo xogo colectivo do equipo naronés e que servía para que o Cidade se sacase o peso dos resultados adversos dos últimos encontros e xogase con maior verticalidade e soltura.
A pesar diso, o Sala Ourense mantivo a tónica dos instantes iniciais cun xogo de catro, desprazamentos intensos e tentando gañar balóns ás costas. O Cidade continuou con defensa a media pista e sen pasar demasiados apuros. Pero se por algo se caracterizou a primeira parte do partido foi polas faltas, que chegaron a condicionar a defensa dos locais durante os últimos minutos de xogo.
Tras o descanso, o Cidade destacou polo traballo en equipo, polo esforzo ofensivo tras a recuperación de balóns e polas incorporacións ao ataque, todo iso aderezado coas boas accións de Alberto desde a portería. Accións que no minuto 24 propiciarían o segundo tanto do encontro, tras un saque en longo do meta local que propiciou gañar unhas costas e unha chegada de segundas
de Guille, que mete de primeiras o 2 a 0.
A partir dese momento, o equipo naronés xogou moi asentado sobre o parqué, sen pasar apuros e ante un Sala Ourense que vía como os seus ataques non daban os froitos esperados. Unha situación que provocaría que o cadro ourensán decidise recorrer á figura do porteiro-xogador a falta de dous minutos para o termo do encontro e que o Cidade non só defendeu á perfección, senón que lle serviu aos locais para anotar no minuto 39 o 3-0 final, obra de Buján
Tras finalizar o partido, o técnico local agradeceu o enorme esforzo realizado por todos os integrantes do plantel naronés “para sacar adiante un partido moi completo e co que o Cidade sácase a espiña de non gañar aínda esta tempada en casa”.
O Cidade de Narón volverá xogar no polideportivo da Gándara o vindeiro sábado 21, a partir das 19 horas, ante o recentemente ascendido Estrada Futsal.
Ficha técnica:
Cidade de Narón: Niceto, Guille, Diego, Brais e Buján. Tamén xogaron Iago Q., Rubén, Iago O. e Oli.
Sala Ourense: Rubén, Alli, Martinzinho, Edgar e Arturo. Tamén xogaron Raúl, Gus, Igor, Dani e Martín.
Goles: (1-0) min. 8, Diego; (2-0) min. 24, Guille; (3-0) min. 39, Buján.
Árbitros: Pablo Coello Martínez e José Luis Rey Hermida (C.T.A.F.S. Galicia). Amonestaron a Diego, no minuto 9; e a Brais, no minuto 18, polo Cidade; a Edgar, no minuto 32; a Arturo, no minuto 34; a Gustavo, no minuto 36; e ao delegado Marcos López, no minuto 35, polo Sala Ourense.
Pavillón: Polideportivo Municipal da Gándara. A porta pechada.
O partido ante o Ribeira FS tivo lugar ante medio cento de espectadores
O Cidade de Narón cae derrotado en Lugo fronte ao líder provisional do grupo
- -O equipo naronés acusou as ausencias do lesionado Iván e de Rubén, sancionado cun encontro
- -Os de Javier Albes enfrontaranse a semana que vén, na Gándara, ao Sala Ourense
Narón, 08 de noviembre de 2020.- O Cidade de Narón caeu derrotado esta mañá en Lugo ante o Ribeira de Piquín FS, líder provisional da táboa, no encontro correspondente á terceira xornada do subgrupo 1B da Segunda División B do Fútbol Sala Nacional. E facíao tras encaixar catro goles. Un marcador que non fai xustiza ao visto na pista do Municipal de Lugo, onde a igualdade entre os dous equipos foi a tónica dominante en boa parte da contenda.
O partido arrincaba ás 12:30 horas cun Cidade de Narón que se desprazaba á Cidade das Murallas con dúas ausencias destacadas entre as súas filas: Iván, lesionado a pasada fin de semana no seu nocello esquerdo; e Rubén sancionado cun encontro tras a súa expulsión fronte ao Xove. A pesar diso, os pupilos de Javi Albes saltaban á cancha dispostos a dominar o encontro. Plantados en media cancha, mentres o Ribeira xogaba cunha presión máis alta, os xogadores naroneses ían gañando metros ata que nun saque de banda próximo á portería defendida por Niceto, produciuse unha pegada exterior que tocou nun xogador naronés desviando o tiro a portería. Corría o minuto 7 e poñía o 1-0 no marcador.
O partido continuaría moi igualado cun equipo local que xeraba dúas ocasións á contra, unha delas dun contra o porteiro, que Niceto resolveu de maneira brillante. Entre tanto, o Cidade decidía xogar con ataques máis directos ante un Ribeira que se foi cargando de faltas e que permitiron ao Cidade dispoñer de ata dúas ocasións para igualar o marcador a través de dous dobres penalties que, con todo, Buján non foi quen de converter.
A última oportunidade para o Cidade antes do descanso sairía das botas de Brais, hoxe reconvertido en pivot, nun tiro raso que desbaratou coa perna o porteiro local.
A segunda parte do encontro arrincaba da mesma maneira que a primeira: dous equipos moi igualados, con máis posesión de balón para o Ribeira ao comezo e segundo ía avanzando o partido, sería o Cidade o que se iría facendo coa bola edominaba o encontro.
O partido rompería tras unha xogada con balón en longo ao que saíu Niceto e que desviaría Iago, con tan mala fortuna que caía nos pés de Javi Regueiro que, tras controlar, goleaba a porta baleira.
Co 2-0 no marcador, Albes decidiu solicitar un tempo morto para tentar traballar con cinco para catro e ir a polo partido. Con todo, nun cambio de porteiro o
Ribeira sacou rápido e marcou o 3-0. O últimos tres minutos do encontro foron de claro dominio do conxunto naronés que xeraba ocasións claras ante un Illy moi acertado. O último tanto dos locais sería obra de Pablo nun balón en longo que cabeceou para anotar o 4-0 final do marcador.
Ao finalizar o encontro, o adestrador naronés recoñecía como “xusta” a vitoria do Ribeira aínda que lamentaba que “nos vaiamos cun marcador excesivamente avultado para a igualdade que se viu ao longo dos corenta minutos de xogo”.
A próxima xornada o Cidade de Narón medirase en casa ante o Sala Ourense, nun partido que se celebrará o sábado 14, a partir das 19 horas, no Polideportivo da Gándara.
Ficha técnica:
Ribeira del Piquín FS:Carlos, Pablo Villar, Pablo Díaz, Diego Lobeiras e Daniel Quintela. Tamén xogaron Fran Alvarez, David Quintela, Fran Montero, Javi Regueiro e Ignacio González .
Cidade de Narón: Niceto, Guille, Diego V., Iago O. e Brais. Tamén xogaron Buján, Iago Q. e Oli.
Goles: (1-0) min. 7, Fran Alvarez; (2-0) min. 32, Javi Regueiro; (3-0) min. 37, Fran Alvarez; (4-0) min. 38, Pablo Díaz.
Árbitros: Daniel Eduardo Muñoz García e Andrés Felipe Vanegas Betancur (C.T.A.F.S. Principado de Asturias). Amonestaron a Pablo D. Villar, no minuto 33 polo Ribeira; e a Iago Q., no minuto 9 polo Cidade.
Pavillón: Polideportivo Municipal de Lugo. Ante medio cento de espectadores.
